米其林餐廳開箱
米其林一星臺灣餐廳
明福台菜海產
藏身佇中山北路二段的巷仔內，一間無到二十坪的餐廳，無論是中晝猶是暗頓，五桌的人客攏是客滿的情形。2018年，明福第一擺被選入米其林臺灣一星餐廳，連續四冬攏有法度佇名單頂，可見餐廳菜色的穩定和好食程度。由於是桌菜，若會當請揣朋友做伙來，人濟點菜才有法度點較濟，才袂拍損。小菜嘛真好食!
古早味的菜脯，鹹甜鹹甜，足好食!
今仔日十二項豐沛的料理，真像辦桌!
真濟明星攏有來過明福食好料!
中晝五桌爾爾!
上鮮的佇遮!
紅蟳米糕
食辦桌上蓋讚的料理之一，因為紅蟳會選有卵的母蟳，代表祝福的意思，向望新人會當早生貴子。米糕嘛是臺灣傳統的料理，內底愛囥紅蔥頭、香菇、豬肉絲、鰇魚等等的焦料。秫米嘛愛鮮炊甲半熟，才和遮的配料濫做伙，閣炊到熟，秫米共遮的好料吸收飽滿了後，呈現金鑠鑠的款，食落去，米糕軟閣入味，紅蟳攏是現刣現炊，有影是一項手路菜，傳統的好滋味!
秫米鮑魚雞
這項嘛是招牌，愛先訂才食有。秫米包佇雞肉內底，煮好的時，已經是軟㽎㽎的米湯，免哺就會通食落去，雞肉一絲一絲綿綿綿，閣有鮑魚肉來提鮮，食了元氣十足，雞湯是上補的料理!
TORO煙腸
內底除了豬肉，閣摻TORO，配一塊蒜頭，有影是氣味特別的煙腸，嘛是來明福愛點的特色菜。
糋烏魚腱
外口滒糋粉，烏魚腱食起來酥酥脆脆，搵寡胡椒粉，上對味!
麻油腰子雞核
寒天著時的料理，麻油和薑共腰子閣雞核仔炒甲真芳，腰子真軟絲，氣味足讚!
糋肥腸
和一般的糋肥腸無仝款的是共蔥仔提起來矣，毋過食起來猶是有蔥仔的芳味。
佛跳牆
這鍋佛跳牆，是明福的招牌菜，內底摻的，和平常時食的佛跳牆，配料淡薄仔無仝，有豬跤、筍仔、馬薺、干貝、香菇、魚翅、雞核、松茸、白果、鮑魚、豬肚等等，足豐湃的一鍋湯。無傳統的芋仔、排骨酥，所致湯真清，真好啉閣清爽袂油，有影是招牌，有機會一定愛來遮啉一碗湯。
糋蝦捲
傳統的糋料，明福的蝦捲用豆皮來包，應該是現包現糋，外口軟閣酥，內底蝦仔的氣味真芳，一人一條拄好!
鴟鴞翼/雞母岫/醬草(野菜山蘇)
原底是原住民料理，這馬變做真濟店家的炒青菜料理，明福較特別的，是摻入客家特產的白豆酺，丁香魚對日本進口，大火炒過，清芳閣紲喙，完全無一般店家炒的苦味，是予人想欲閣夾幾擺的一項菜。
烘九孔
飽滇閣實櫼的九孔，頂懸擠一寡白醋，烘過了後，一點仔臭火焦，無過氣味仝款真讚!九孔真鮮，佇冰箱櫥攏看會著。
蒜頭蚵仔(蒜泥香蚵)
冷拌的菜，欲好食，一定愛鮮。定定佇冷盤才會出現的蒜頭蚵仔，這馬變做一項主菜，蚵仔外口先滒一寡太白粉，閣用蒜頭豆油來壓味，配淡薄仔芫荽上合味。
糋芋丸
最後一項甜的，就是代表菜色到路尾。明福的芋丸，內底包紅豆餡，軟絲閣芳，嘛是手工做的，丸和圓滿的圓仝音，代表來食料理的人，這一冬攏會當圓滿順利!
#明福臺菜海產
#地址🏠：10491台北市中山區中山北路二段137巷18-1號
#營業時間⏰：12:00-14:00；18:00-21:00
#電話☎️：02 2562 9287
#需要預訂
留言列表
